"Ливерпуль" хавотирга туша бошлади. Ҳимоячи Ибраим Конате клуб билан шартномасини узайтирмади, амалдаги меҳнат шартномаси эса бир йилдан сўнг ўз ниҳоясига етади. Музокаралар жараёнида олдинга силжиш йўқ ва мерсисайдликлар мавсумдан кейин уни текинга йўқотмаслик учун муҳим ўйинчини шу ёздаёқ сотиб юбориши мумкин.
Fichajes нашрининг ёзишича, Конатенинг ҳолатини эркин агентлар томонидан топ-футболчиларнинг қўлга киритилишига кўника бошлаган "Реал" диққат билан кузатмоқда. Мадридликлар Конате билан бир йилдан кейин худди шундай ишни амалга ошириши мумкин. Шу билан бирга, манбага ишонадиган бўлсак, "қаймоқранглилар" шу ёздаёқ "Ливерпуль"га таклиф билан чиқиш имкониятини истисно қилмаяпти. Барчаси "Ливерпуль" ва 26 ёшли Конате ўртасидаги вазиятнинг кейинги ривожига боғлиқ бўлади.
