"Andijon" – "Qizilqum" (1:1) jamoalari o‘rtasidagi uchrashuvdan keyin tashkil qilingan matbuot anjumanining ilk qismida mehmonlarning vaqtincha bosh murabbiyi Akmal Rustamov qatnashdi.
- O‘tgan turdagi uchrashuvdan keyin biz uchun tayyorgarligimizga vaqtimiz kam edi. Shunga qaramay, uch kun oldin Andijonga kelib tayyorgarlik olib bordik. Yigitlarga Andijon havosi, iqlimiga moslashishiga sharoit yaratdik. "Andijon" O‘zbekistondagi yaxshi jamoalardan biri. Ayniqsa, o‘z uyida muxlislari oldida yaxshi futbol namoyish qiladi. Biz buni bilardik. Ishqibozlari 12-o‘yinchisi. Shunga qaramay, futbolchilarimga rahmat aytaman. O‘tgan o‘yinda taktikamizda biroz o‘zgarish qildik. Ayrim xatolar bor, buning ustida ishlashimiz kerak. O‘z jamoamni qo‘lga kiritgan bir ochko bilan tabriklamoqchiman. Yigitlar o‘yinga qo‘yilgan ko‘rsatmalarni 100 foiz bajarishgani uchun minnatdorman. Navoiydan kelib bizni qo‘llab-quvvatlagan muxlislarimizga katta rahmat.
- "Qizilqum" jamoasi beshta himoyachi bilan o‘ynadi. Bu sizni taktikangizmidi?
- Xuddi shunday. Nikola Lazarevich ishlagan paytda 4-1-4-1 sxemasida o‘ynayotgandik. Bilasizlar, hozirda 4-5 ta yo‘qotishlarimiz mavjud. Oldinga uchrashuvda Shaxzod Rahmatullaev ham jarohat oldi. Shunga qaramasdan o‘tgan turda taktik sxemani o‘zgartirishga majbur bo‘lgandik. Futbolchilarga ham bu taktik sxema yoqyapti. O‘yin paytida bu 2-3 ta sxemaga aylanadi. Hujumga chiqqan paytimizda 2-3 ta hujumchi bo‘ladi. Orqaga o‘tgan paytimizda 5 ta himoyachi sxemasiga o‘tamiz. "So‘g‘diyona" bilan bahsda buni sinab ko‘rdik. Ushbu taktika ustida yana ishlaymiz. Xudo xohlasa, natija bo‘ladi.
- Zaxiradan maydonga tushgan futbolchilar o‘yinni qanchalik kuchaytira oldilar?
- Yana qaytaraman, 5-6 ta yo‘qotishimiz bor. Yoshlarga ishonch bildiryapmiz va bu yo‘lda davom etamiz. Navoiyning akademiyasidan, maktabidan chiqqan bolalarimiz bor. Ularga ishonamiz va moslashib ketishlari uchun vaqt kerak. Yoshlarga ishonch bildirmasak zaxirada o‘tiraveradilar. Ishonch bildirib, necha daqiqa bo‘lsa ham har uchrashuvda maydonga tushirsak moslashib ketishiga ishonchim komil.
