Superliganing 13-turi doirasida "Mash’al" — "Nasaf" bahsi yakunlanganidan keyin mehmonlar ustozi Ro‘ziqul Berdiyev matbuot anjumanida qatnashdi.

— G‘alabaga erishdik, bu biz uchun juda muhim edi. Safarda uch ochko olish jadvalda yaxshi ta’sir qiladigan narsa. Shu sababli bugun yigitlarimiz g‘alaba uchun o‘ynadi. O‘yinni yaxshi boshladik. Birinchi bo‘limda o‘yindagi nazoratimiz ham yaxshi edi. Ikkinchi bo‘lim boshida tashabbusni "Mash’al"ga berib qo‘ydik. Shuning evaziga gol o‘tkazib yubordik. Shunga qaramasdan jamoamda o‘ziga bo‘lgan ishonchi bor edi. O‘zgarishlar va taktik yurishlarimiz ish berdi va bugun g‘alabani qo‘lga kiritdik.

— Umar Eshmurodovning ikkinchi bo‘limdagi o‘zgarishiga ko‘p xato qilayotgani sabab bo‘ldimi?

— Birinchi bo‘limni jarohat bilan tugatdi. Kiyim almashtirish xonasiga borganimda u o‘ynashga qiynalayotganini aytdi. Uni majburlamadik. Majburiy almashish bo‘ldi.

— Islom Kenjaboyev bilan tuzilgan shartnoma bekor qilindi. Uning ketishi kutilganmidi?

— U bir yil davomida jarohati sababli o‘ynamadi va jarohatini davoladi. Shu bilan birga klub bilan bo‘lib turdi. Tuzalganidan keyin o‘yinlarga sekin-sekin jalb qilib, jismoniy holatini tiklab olishimiz kerak edi. Lekin u ko‘proq o‘ynashni xohladi. Shu uchun ketishga qaror qildi. O‘zaro kelishgan holda Kenjaboyevga omad tiladik.

— Davralar oralig‘i yaqin. Jamoa tarkibida o‘zgarishlar bo‘ladimi? "Nasaf"da ham kamchiliklar ko‘rindi va buni yopishga harakatlar bo‘lsa kerak.

— Bu jarayon ketmoqda. Ayrim nuqtalar bo‘yicha 2-3ta futbolchi olishni rejalashtiryapmiz. Agarda bu amalga oshsa, biz jamoaning o‘yinin kuchaytira oladigan futbolchilarni chaqirmoqchimiz.

— Aynan qaysi pozisiyalar?

— Buni aytmay qo‘yaqolay. Lekin rejamizda kamida 2-3 futbolchi bor.

— Ular legionermi yoki mahalliy futbolchi?

— Legioner ham bor, mahalliy ham. Lekin ko‘proq e’tiborimiz legionerlarga qaratilgan. Balki bu amalga oshsa, hammaga yetkazamiz.

— OAVda Aziz G‘aniyevning "Nasaf"ga qaytishi borasida xabarlar chiqdi. Bu qanchalik haqiqatga yaqin?

— Aziz bo‘yicha hech qanday gap yo‘q. Uning klubi bilan yaxshigina shartnomasi bor, menimcha u bu yerga endi qaytmasa kerak.