Fransiyalik yarim himoyachi Pol Pogba taxminan ikki haftadan beri "Monako" bilan uning transferi bo‘yicha muzokaralar olib bormoqda. Biroq futbolchi haligacha klub bilan shartnoma imzolamagan. L’Equipe nashri xabariga ko‘ra, Pogba Saudiya Arabistonidan taklif kutishi mumkin, shu bois u fransuz klubi bilan o‘zini majburiyatlar bilan bog‘lashga shoshilmayapti.
Eslatib o‘tamiz, doping iste’mol qilgani uchun Pogbaning to‘rt yillik diskvalifikasiyasi 18 oygacha qisqartirildi. Shunday qilib, Fransiya terma jamoasining sobiq futbolchisi mart oyidayoq diskvalifikasiya muddatini o‘tab bo‘lgan edi. OAV ma’lumotlariga ko‘ra, Pogbaga "Monako"dan tashqari "Marsel" ham qiziqish bildirmoqda. O‘yinchining o‘zi hali kelajagi haqida yakuniy qarorga kelmagan.
