Bugun, 21 iyun kuni Toshkent shahrining Mirzo Ulug‘bek nomidagi xiyobonida ommaviy yoga festivali tashkil etildi.
Festivalning ochilish marosimida O‘zbekiston Respublikasi sport vaziri Adham Ikramov va Hindistonning O‘zbekistondagi elchisi Smita Pant ishtirok etib, yoga inson ongini va tana uyg‘unligini mustahkamlashi, salomatlik hamda tafakkur rivojiga xizmat qilishi haqida so‘z yuritdilar.
Tadbirda Toshkent shahridagi turli korxona va tashkilotlar xodimlari, yoga markazlari a’zolari, o‘quvchilar, mahalliy aholi hamda xorijiy mehmonlar ishtirok etib, yoga mashqlarini bajarishdi.
E’tiborlisi, ushbu festival 2019 yildan buyon muntazam o‘tkazilib kelinmoqda. O‘tgan yillar davomida yoga bilan shug‘ullanuvchilarning soni ortib, mamlakatimizning turli hududlarida yoga klublari tashkil etildi.
Mazkur klublarda faoliyat yuritayotgan sportchilarimiz joriy yilning 25–27 aprel kunlari Hindistonning Nyu-Dehli shahrida bo‘lib o‘tgan ikkinchi Osiyo chempionatida 26 ta medalni qo‘lga kiritishdi. Bu O‘zbekistonda yoga sportining jadal rivojlanayotganidan dalolat beradi.
