O‘zbekiston Superligasining 13-turi doirasida navbatdagi ikki uchrashuv bo‘lib o‘tdi. Toshkentdagi “Jar” stadionida “Paxtakor” jamoasi “Qo‘qon-1912”ni 2:0 hisobida mag‘lub etdi. G‘uzorda esa “Sho‘rtan” “Surxon”ni 2:1 hisobida yengdi.
Toshkentdagi uchrashuvning hisobini 17-daqiqada Diyor Xolmatov ochdi. U ajoyib kombinasion hujum yakunida to‘pni darvozaga yo‘llab, “Paxtakor”ni oldinga olib chiqdi.
O‘yin yakuniga yaqin — 90+5-daqiqada Brayan Riaskos raqib darvozasini ishg‘ol qilib, yakuniy natijani belgiladi — 2:0. Ushbu g‘alaba evaziga “Paxtakor” o‘z ochkolari sonini 22 taga yetkazib, turnir jadvalida 6-o‘ringa ko‘tarildi. “Qo‘qon-1912” esa 12 ochko bilan 14-pog‘onani egallab turibdi.
G‘uzorda kechgan o‘yin ancha qizg‘in boshlandi. Uchrashuvning 7-daqiqasida Humoyun Sherbo‘tayev hisobni ochib, “Surxon”ni oldinga olib chiqdi — 0:1.
34-daqiqada mehmonlar bir o‘yinchidan mahrum bo‘ldi. Sunnat Hamidjonov hakam tomonidan qizil kartochka bilan jazolandi. Ushbu vaziyatdan keyin mezbonlar tashabbusni o‘z qo‘liga oldi.
Birinchi bo‘limning 45+2-daqiqasida G‘anisher Qodirov hisobni tenglashtirdi. Ikkinchi bo‘limning 66-daqiqasida esa Abror Toshqo‘ziyev “Sho‘rtan”ning g‘alaba goliga mualliflik qildi.
Ushbu natija o‘yinning oxirigacha o‘zgarmadi. “Sho‘rtan” 3 ochkoni qo‘lga kiritib, ochkolar sonini 9 taga yetkazdi. Shunga qaramay, jamoa turnir jadvalining so‘nggi pog‘onasida qolmoqda. “Surxon” esa 14 ochko bilan 11-o‘rinni egallab turibdi.
O‘zbekiston Superligasi
13-tur
22 iyun, yakshanba
“Paxtakor” — “Qo‘qon-1912” 2:0
Gollar: 1:0 — Diyor Xolmatov (17), 2:0 — Riaskos (90+5).
“Sho‘rtan” — “Surxon” 2:0
Gollar: 0:1 — Humoyun Sherbo‘tayev (7), 1:1 — G‘anisher Qodirov (45+2), 2:1 — Abror Toshqo‘ziyev (66).
