CaughtOffside xabariga ko‘ra, "Nyukasl" "Manchester Yunayted" hujumchisi Markus Reshfordni o‘z safiga qo‘shib olish uchun jiddiy qadamlar tashlamoqda.

Angliyalik futbolchi "Yunayted"ga Ruben Amorim kelishi bilan asosiy tarkibdagi o‘rnini yo‘qotgach, jamoani tark etishi kutilmoqda. Bu uning o‘tgan mavsumning ikkinchi yarmi uchun "Aston Villa"ga ijaraga berilishiga olib keldi, ammo endi futbolchi yana klubini o‘zgartiradigan ko‘rinadi. Reshfordning o‘zi "Barselona"ga o‘tishni afzal ko‘rmoqda, ammo u kataloniyaliklarning ustuvor maqsadiga aylanadimi yoki yo‘qmi, hozircha noma’lum.

"Nyukasl" bu yozda hujum chizig‘ini kuchaytirishga intilmoqda. Klub allaqachon "Nottingem Forest" vingeri Entoni Elangani o‘z safiga qo‘shib olish uchun so‘rov yuborgan, ammo rad javobini olgan, shuning uchun Reshford unga muqobil bo‘lishi mumkin. Hozirda manbalarning xabar berishicha, "Nyukasl" Reshfordni ijaraga olishga intilmoqda, garchi "Yunayted" futbolchini doimiy ravishda sotmoqchi bo‘lsa ham.

Qo‘shimcha qilamizki, Markus Reshford "Aston Villa" safida barcha musobaqalarda 17ta o‘yinda maydonga tushib, 4ta gol urgan va 6ta golga hammualliflik qilgan.