Shaxmat bo‘yicha 13-jahon chempioni Garri Kasparov Janubiy Sudanda davlat to‘ntarishini tayyorlash va qurol savdosiga aloqadorlikda ayblanmoqda. Bu haqda Bloomberg xabar bermoqda.

Ma’lum bo‘lishicha, grossmeyster Janubiy Sudan davlatida hokimiyatni ag‘darish uchun mo‘ljallangan qurollarni xarid qilishga aloqador bo‘lgan.

Nashr ma’lumotlariga ko‘ra, u janubiy sudanlik inqilobchi Piter Ajakni Uoll-strit moliyachisi Robert Graneri bilan uchrashtirib, natijada Kalashnikov avtomatlari, granatalar va Stinger zenit-raketa tizimlari uchun yetti million dollar ajratilishiga erishgan.

Jurnalistlar Kasparovdan ushbu ma’lumotlarni sharhlashni so‘rashgan. U esa qurolli davlat to‘ntarishiga urinishga aloqasi yo‘qligini ta’kidlagan.

“Mening obro‘yim va tamoyillarim aniq va o‘zgarmasdir. Men hayotimning katta qismini fuqarolik huquqlari uchun kurash va butun dunyo bo‘ylab demokratiyani targ‘ib qilishga bag‘ishlaganman”, dedi Garri Kasparov.

Garri Kasparov — SSSRda xizmat ko‘rsatgan sport ustasi, shaxmat bo‘yicha 13-jahon chempioni.U 2005 yilda shaxmatchilik faoliyatini yakunlagan. Shundan buyon siyosat bilan shug‘ullanadi.

Rossiya Adliya vazirligi 2022 yilda Kasparovni xorijiy agent vazifasini bajaruvchi jismoniy shaxslar ro‘yxatiga kiritgan. Xorijiy moliyalashtirish manbalari sifatida Ukraina va Human Rights Foundation tashkiloti ko‘rsatilgan.

2024 yil mart oyida Kasparov “Rosfinmonitoring”ning terrorchilar va ekstremistlar ro‘yxatiga kiritilgan. Bu safar u ekstremistik faoliyat yoki terrorizmga aloqadorligi haqida ma’lumotlar mavjud bo‘lgan shaxslar va tashkilotlar ro‘yxatiga qo‘shilgan. 24 aprelda esa Komi sudi Garri Kasparovni sirtdan qamoqqa olish haqida hukm chiqargan. Sud hukmiga ko‘ra, u terrorchilik jamiyatini tuzganlikda, unga rahbarlik qilganlikda, terrorchilik faoliyatini moliyalashtirganlikda va uni ommaviy oqlaganlikda ayblangan.