Шахмат бўйича 13-жаҳон чемпиони Гарри Каспаров Жанубий Суданда давлат тўнтаришини тайёрлаш ва қурол савдосига алоқадорликда айбланмоқда. Бу ҳақда Bloomberg хабар бермоқда.

Маълум бўлишича, гроссмейстер Жанубий Судан давлатида ҳокимиятни ағдариш учун мўлжалланган қуролларни харид қилишга алоқадор бўлган.

Нашр маълумотларига кўра, у жанубий суданлик инқилобчи Питер Ажакни Уолл-стрит молиячиси Роберт Гранери билан учраштириб, натижада Калашников автоматлари, гранаталар ва Stinger зенит-ракета тизимлари учун етти миллион доллар ажратилишига эришган.

Журналистлар Каспаровдан ушбу маълумотларни шарҳлашни сўрашган. У эса қуролли давлат тўнтаришига уринишга алоқаси йўқлигини таъкидлаган.

“Менинг обрўйим ва тамойилларим аниқ ва ўзгармасдир. Мен ҳаётимнинг катта қисмини фуқаролик ҳуқуқлари учун кураш ва бутун дунё бўйлаб демократияни тарғиб қилишга бағишлаганман”, деди Гарри Каспаров.

Гарри Каспаров — СССРда хизмат кўрсатган спорт устаси, шахмат бўйича 13-жаҳон чемпиони.У 2005 йилда шахматчилик фаолиятини якунлаган. Шундан буён сиёсат билан шуғулланади.

Россия Адлия вазирлиги 2022 йилда Каспаровни хорижий агент вазифасини бажарувчи жисмоний шахслар рўйхатига киритган. Хорижий молиялаштириш манбалари сифатида Украина ва Human Rights Foundation ташкилоти кўрсатилган.

2024 йил март ойида Каспаров “Росфинмониторинг”нинг террорчилар ва экстремистлар рўйхатига киритилган. Бу сафар у экстремистик фаолият ёки терроризмга алоқадорлиги ҳақида маълумотлар мавжуд бўлган шахслар ва ташкилотлар рўйхатига қўшилган. 24 апрелда эса Коми суди Гарри Каспаровни сиртдан қамоққа олиш ҳақида ҳукм чиқарган. Суд ҳукмига кўра, у террорчилик жамиятини тузганликда, унга раҳбарлик қилганликда, террорчилик фаолиятини молиялаштирганликда ва уни оммавий оқлаганликда айбланган.