Cuperligada 14-tur o‘yinlari davom ettiriladi. Bugun turning markaziy bahsi Qarshida bo‘lib o‘tadi.

"Qo‘qon 1912" - "Dinamo"

Bu o‘yin ham qiziqarli kechadi. Har holda mezbonlar mag‘lubiyatlar ko‘chasidan chiqib keta olmayapti. “Nasaf”, “Paxtakor”, OKMK, “Mash’al”ga yutqazib qo‘ydi. O‘zbekiston kubogida “Bunyodkor”ga imkoniyat boy berildi. Qisqasi, jamoaning ishlari hozircha yaxshi emas. Bugun yana yutqazadigan bo‘lsa, murabbiylar shtabida o‘zgarishlar kuzatilsa kerak. Har holda jamoa ishqibozlari hozirgi natijalardan xursand emas.

O‘tgan turda mavsumdagi ilk mag‘lubiyatini qabul qilgan “Dinamo”da hech narsa o‘zgargani yo‘q. Samarqandliklar birgina omadsizlikdan tushkunlikka tushib qolmasa kerak. Vadim Abramov yaxshi mutaxassis va qiyin holatda ham jamoani vaziyatdan olib chiqib keta olishini hamma yaxshi biladi. Bugungi o‘yinda samarqandliklar biroz ustunlikka ega. Qolganini vaqt ko‘rsatadi.

"Nasaf" - "Paxtakor"

Turning balki eng kamida birinchi davraning eng markaziy o‘yinlaridan biri. Amaldagi chempion va peshqadam "Nasaf"da ishlar besh. Pastdagilarning qoqilishi evaziga jadvalda ham 6 ochkolik tafovut yuzaga keldi. “Paxtakor” qanchalik noqulay raqib bo‘lmasin, “ajdarlar” bugun g‘alaba qozonish uchun maydonga tushadi. Qolaversa, O‘zbekiston kubogida 6-3 hisobidagi mag‘lubiyat uchun qasos olishga harakat qiladi. Yana bir fakt shuki, Berdiyev shogirdlari o‘sha mag‘lubiyatdan so‘ng hali mag‘lubiyatga uchrganicha yo‘q.

"Paxtakor" sekin-astalik bilan o‘ziga kelyapti. Tojiyev murabbiylikka tayinlanganidan keyin oxirgi 6 bahsda faqat 1 durang qayd etildi. Qolgan o‘yinlarda “sherlar” yaxshi va mazmunli o‘yin ko‘rsatib, turnir jadvalidagi holatini ham yaxshilab olishdi. Qisqasi, Qarshida dramatik jang kechishiga hech qanday shubha yo‘q. Qolganini tez orada bilib olamiz.