Madridning "Real" klubi yosh hujumchisi Endrik tez orada klublar o‘rtasidagi jahon chempionatida jamoa safiga qo‘shiladi.

Marca xabariga ko‘ra, 18 yoshli braziliyalik 28 iyun, shanba kuni AQSHga uchib keladi. Endrik may oyida payidan olgan jarohati tufayli turnirning guruh bosqichini o‘tkazib yubordi. Dastlab shifokorlar ikki oylik tiklanish muddatini bashorat qilishgan edi, ammo hujumchi reabilitasiyaning yakuniy bosqichini allaqachon Amerika zaminida joylashgan jamoa lagerida o‘tkazadi.

"Real" bosh murabbiyi Xabi Alonso hujumchining tezroq mashg‘ulotlarga qo‘shilishiga umid qilmoqda. Endrik asosiy guruh bilan ishlashni boshlashdan oldin yakuniy tibbiy ko‘rikdan o‘tadi, uning natijalariga ko‘ra uning tayyorligi to‘g‘risida qaror qabul qilinadi.