Мадриднинг "Реал" клуби ёш ҳужумчиси Эндрик тез орада клублар ўртасидаги жаҳон чемпионатида жамоа сафига қўшилади.
Marca хабарига кўра, 18 ёшли бразилиялик 28 июнь, шанба куни АҚШга учиб келади. Эндрик май ойида пайидан олган жароҳати туфайли турнирнинг гуруҳ босқичини ўтказиб юборди. Дастлаб шифокорлар икки ойлик тикланиш муддатини башорат қилишган эди, аммо ҳужумчи реабилитациянинг якуний босқичини аллақачон Америка заминида жойлашган жамоа лагерида ўтказади.
"Реал" бош мураббийи Хаби Алонсо ҳужумчининг тезроқ машғулотларга қўшилишига умид қилмоқда. Эндрик асосий гуруҳ билан ишлашни бошлашдан олдин якуний тиббий кўрикдан ўтади, унинг натижаларига кўра унинг тайёрлиги тўғрисида қарор қабул қилинади.
