Gabriel Martinelli "Bavariya" va "An-Nasr" e’tiborida bo‘lmoqda.

CBS Sports xabariga ko‘ra, "Arsenal" hujumning chap qanotida o‘ynaydigan yangi futbolchi sotib olishni maqsad qilgan, ammo Martinellini sotmoqchi emas.

24 yoshli braziliyalik futbolchiga "Bavariya" qiziqish bildirmoqda. Manbaga ko‘ra, "An-Nasr" Martinellining nomzodini klub ichida muhokama qilgan, ammo rasmiy taklif bilan chiqmagan va hozirda uni tayyorlamayapti.

Futbolchining o‘ziga yaqin manbalarning ta’kidlashicha, u faoliyatining hozirgi bosqichida Saudiya Arabistoniga ko‘chib o‘tish haqida o‘ylamayapti. Gabriel JCH-2026da Braziliya terma jamoasidan o‘rin olishni maqsad qilgan.

Martinellining "Arsenal" bilan shartnomasi 2027 yilgacha mo‘ljallangan bo‘lib, uni yana bir yilga uzaytirish imkoniyati mavjud.

APLning o‘tgan mavsumida vinger 33 ta o‘yinda maydonga tushib, 8 ta gol urdi va 4 ta golli uzatmani amalga oshirdi.