Iyul oyining ilk kunlari mamlakatimiz gandbolchilari uchun xalqaro musobaqalarga boyligi bilan alohida ajralib turadi.

Ularning ikkitasi Yevropa mamlakatlarida tashkil etilayotgani e’tiborli. Joriy yilning 4-16 iyul kunlari Italiyaning Teramo shahrida 18 yoshgacha bo‘lgan o‘g‘il bolalar o‘rtasida “52th Interamnia World Cup” musobaqasi bo‘lib o‘tadi.

52-bor tashkil etilayotgan mazkur jahon kubogida 40 ga yaqin mamlakatning terma jamoalari qatorida O‘zbekiston o‘smirlar terma jamoasi g‘oliblik uchun kurash olib boradi.

Aytish lozim, o‘tgan yilgi jahon kubogida O‘zbekiston U-18 o‘smirlar jamoamiz o‘z yosh toifasida qatnashgan 17 ta jamoa orasida kumush medalga ega chiqqan edi. O‘shanda yosh gandbolchilarimiz Polsha, Fransiya, Xitoy Taypeyi, Liviya, Italiya, Jazoir kabi mamlakatlarning terma jamoalari bilan bahs olib borgan.

Kuni kecha mamlakatimiz gandbolchilar jamoasi Italiyaga jo‘nab ketdi.

2008-2009 yillarda tug‘ilgan gandbolchi qizlardan iborat O‘zbekiston U-18 terma jamoasi Fransiyada o‘tadigan “Paris World Games” o‘yinlarida yurtimiz sharafini himoya qiladi.

Shu yilning 7-12 iyul kunlari Parij shahrida o‘tadigan gandbol musobaqalarida ishtirok etadigan terma jamoamiz a’zolari ayni kunlarda tajribali murabbiylar Ulug‘bek Ikromov, Zinaida Penkova, Akromali Yangiboyev va Zahro Allayarova qo‘l ostida o‘quv-mashg‘ulot yig‘inida qatnashmoqda.