O‘zbekiston futzal federasiyasi yosh avlod vakillarini sportga jalb etish va ularning iqtidorini rivojlantirish bo‘yicha izchil harakat qilmoqda. Endilikda futzal nafaqat jismoniy faollik, balki yuksak maqsadlarga eltuvchi yo‘l sifatida qaralayapti.

Shu yo‘nalishda o‘tkazilayotgan seleksiya mashg‘ulotlarining navbatdagisi bugun Jizzax shahrida bo‘lib o‘tdi. Uzoq-yaqin, misol uchun 70 km masofadagi Baxmal tumanidan, kelgan 50 dan ortiq yosh iqtidor egalari tanlovdan o‘tish uchun ikki guruhga bo‘lingan holda sinovlarda o‘z mahoratini namoyish qilish uchun maydonga tushishdi. Ularning harakatlarini O‘zbekiston o‘smirlar futzal terma jamoasi bosh murabbiyi Dilshod Rahmatov diqqat bilan kuzatdi va mahalliy mutaxassislar bilan fikr almashgan holda istiqbolli nomzodlarni belgilab oldi.

Bu seleksiya oddiy saralash emas, balki respublika miqyosida iqtidorli yoshlar uchun ochilayotgan keng imkoniyatlar eshigidir. Tanlovda ishtirok etgan har bir o‘smir uchun mamlakat terma jamoalari darajasiga chiqish endi xayol emas — aniq maqsadga aylangan. Ishtirokchilar va ularning otalari ham murabbiylar tomonidan barcha ishtirokchilarga teng sharoit yaratilganini alohida e’tirof etishdi.

Eslatib o‘tamiz, 2026 yilgi Dakar (Senegal) shahrida o‘tadigan IV yozgi o‘smirlar Olimpiadasida O‘zbekiston futzal bo‘yicha ilk bor qatnashishi mumkin. Balki bugun aniqlangan yosh yulduzlar ertaga xalqaro maydonlarda yurtimiz sharafini himoya qilsa ajab emas.