O‘zbekiston terma jamoasi hujumchisi Eldor Shomurodov “Roma”ni tark etishga yaqin turibdi. Romapress nashrining xabar berishicha, futbolchi Turkiya Superligasi vakili “Istanbul Bashakshehir” bilan shartnoma imzolash arafasida turibdi.

Manbaga ko‘ra, “Bashakshehir” “Roma” va Eldor bilan kelishuvga erishgan va transfer yaqin kunlarda rasman e’lon qilinishi kutilmoqda. Futbolchi turk klubi safiga o‘tishga rozi bo‘lgan. Transfer narxi hozircha ma’lum emas, biroq Skysports nashri xabariga ko‘ra, rimliklar hujumchini 7-8 million yevro atrofida sotishni maqsad qilgan.

“Roma” hozirda UYEFA moliyaviy feyr-pley talablari doirasida jamoa tarkibini optimallashtirish va qo‘shimcha mablag‘ yig‘ish ustida ish olib bormoqda. Shomurodovning ketishi bu jarayonda muhim rol o‘ynashi kutilmoqda.

Avvalroq Shomurodovga Fransiyaning “Renn” hamda Italiyaning “Kremoneze” klublari ham qiziqish bildirayotgani haqida xabarlar tarqalgan edi.

Ma’lumot uchun, Shomurodovning “Roma” bilan amaldagi shartnomasi 2026 yil yozigacha amal qiladi. Transfermarkt portali hujumchining bozor qiymatini 5 million yevroga baholamoqda.

27 yoshli futbolchi 2024/25 yilgi mavsumda “Roma” safida jami 37 ta o‘yinda maydonga tushib, o‘z hisobiga 7 ta gol va 5 ta golli uzatma yozdirib qo‘ygan.