Klublar o‘rtasidagi jahon chempionati chorak final uchrashuvida Madridning “Real” klubi Dortmundning “Borussiya” jamoasini 3:2 hisobida mag‘lub etdi. Bu madridliklar yarim himoyachisi Federiko Valverde uchun muhim o‘yin bo‘ldi.

Madrid Zone ma’lumotlariga ko‘ra, urugvaylik futbolchi joriy mavsumda "Real Madrid" safida barcha musobaqalar doirasidagi 64-rasmiy o‘yinini o‘tkazdi va bu Yevropaning top 5 ligasi futbolchilari orasida bir mavsumda o‘ynagan o‘yinlar soni bo‘yicha 21-asr rekordini takrorladi.

Faqat uchta o‘yinchi shuncha o‘yin o‘tkazgan: 2009/2010 mavsumda Xose Xurado ("Atletiko"), 2012/2013 mavsumda Oskar ("Chelsi") va 2012/2013 yilgi mavsumda Fernando Torres ("Chelsi").

Keyingi o‘yin Valverdeni ushbu ko‘rsatkich bo‘yicha mutlaq rekordchiga aylantiradi. Eslatib o‘tamiz, klublar o‘rtasidagi jahon chempionati yarim finalida "Real" "PSJ" bilan o‘ynaydi.