"Chelsi" sardori Ris Jeyms jamoaning yangi hujumchisi Joao Pedro haqida qanday fikrda ekanini aytdi.
"Ko‘klar" braziliyalikni iyul oyi boshida "Brayton"dan sotib olgan va transfer uchun taxminan 64 mln yevro to‘lagandi. Yaqinda bo‘lib o‘tgan klublar o‘rtasidagi jahon chempionati yarim finalida forvard dubl qayd etib, jamoasiga "Fluminense" (2:0) ustidan g‘alaba keltirdi.
"Joao - ajoyib yosh futbolchi. Men unga qarshi bir necha bor o‘ynaganman. Ishonchim komil, ko‘pchilik uning qanchalik yaxshi ekanligini bilgan. U birinchi o‘yindayoq ikkita gol urdi - odamlar uning nimalarga qodirligini ko‘rishdi. U biz bilan ekanligidan xursandmiz," - deya Jeymsning so‘zlarini keltiradi Absolute Chelsea.
