"Roma"ning sobiq bosh murabbiyi, hozirda klub rahbariyatida ishlayotgan Klaudio Ranyeri klubning 2024/2025 yilgi mavsum yakunlariga ko‘ra Chempionlar ligasiga chiqa olmagani haqida gapirdi.
Rimliklar A Seriyada beshinchi o‘rinni egalladi va Yevropa Ligasida ishtirok etadi.
"Chempionlar ligasi yo‘llanmasini qo‘ldan boy berganimdan afsuslanmayman. Uzumga qo‘li yetmay, achchiq ekan, deydigan tulkiga o‘xshagim kelmaydi. Ehtimol, shunday bo‘lgani yaxshiroqdir. Hozir biz barcha superklublar bilan Chempionlar Ligasida to‘qnash kelishga tayyor emasmiz. Umid qilamanki, bir necha yildan keyin biz bu klublar bilan bir xil darajada bo‘lamiz," - deya Ranyerining so‘zlarini keltiradi Football Italia.
73 yoshli Ranyeri 2024 yilning noyabrida yana rimliklar boshqaruviga qaytgandi va o‘tgan mavsum oxirigacha ishladi. Avvalroq, mutaxassis 2009-2011 yillarda va 2019 yilning martidan iyunigacha "Roma" bosh murabbiyi lavozimida ishlagan.













