Slovakiyalik yarim himoyachi Ondrey Duda Saudiya Arabistonining "Al-Ittifoq" klubiga o‘tdi. Bu haqda jamoaning ijtimoiy tarmoqlari xabar bermoqda.
Bitim tafsilotlari hozircha oshkor etilmagan. Boshqa manbalardan olingan ma’lumotlarga ko‘ra, bungacha Italiyaning "Verona" klubida to‘p tepgan futbolchi erkin agent sifatida ikki yillik shartnomaga imzo chekkan.
Qayd etilishicha, 29 yoshli Duda jamoaga murabbiy Saad Al-SHahroniyning tavsiyasi bilan qo‘shilgan. U uning universalligini - tayanch yarim himoyachisi va markaziy himoyachi pozisiyalarida o‘ynay olishini qadrlaydi.
O‘tgan mavsumda Duda barcha klub musobaqalarida 29 ta o‘yinda maydonga tushib, 1 ta gol urgan va 4 ta golga hammualliflik qilgan. Uning bozor qiymati 3,5 million yevroga baholanmoqda.
