Словакиялик ярим ҳимоячи Ондрей Дуда Саудия Арабистонининг "Ал-Иттифоқ" клубига ўтди. Бу ҳақда жамоанинг ижтимоий тармоқлари хабар бермоқда.
Битим тафсилотлари ҳозирча ошкор этилмаган. Бошқа манбалардан олинган маълумотларга кўра, бунгача Италиянинг "Верона" клубида тўп тепган футболчи эркин агент сифатида икки йиллик шартномага имзо чеккан.
Қайд этилишича, 29 ёшли Дуда жамоага мураббий Саад Ал-Шаҳронийнинг тавсияси билан қўшилган. У унинг универсаллигини - таянч ярим ҳимоячиси ва марказий ҳимоячи позицияларида ўйнай олишини қадрлайди.
Ўтган мавсумда Дуда барча клуб мусобақаларида 29 та ўйинда майдонга тушиб, 1 та гол урган ва 4 та голга ҳаммуаллифлик қилган. Унинг бозор қиймати 3,5 миллион еврога баҳоланмоқда.
