"Liverpul" vingeri Federiko Kyeza "Atalanta"ga o‘tishi mumkin. Italiyalik futbolchi "qizillar"ning yaqinlashib kelayotgan mavsumoldi yig‘iniga yo‘l olgan qaydnomaga kiritilmadi va uning tez orada ketish ehtimoli ancha yuqori hisoblanadi. Jurnalist Mikele Krishtiyeloning yozishicha, "Atalanta" 27 yoshli futbolchi uchun 12 mln yevro taklif qilishga tayyor. Muzokaralar tez orada boshlanadi.
Federiko Kyeza o‘tgan yilning avgustida "Yuventus"dan 12 mln yevro evaziga "Liverpul"ga o‘tgandi. Futbolchining mersisaydliklar bilan amaldagi shartnomasi 2028 yilning yoziga qadar mo‘ljallangan.
O‘tgan mavsumda Kyeza Arne Slot jamoasi safida barcha musobaqalarda 14 ta o‘yinda maydonga tushib, 2 ta gol va 2 ta golli uzatmani amalga oshirdi.
