Nauel Molina "Yuventus"ga o‘tishi mumkin.

Turin klubi "Atletiko" bilan 27 yoshli himoyachining transferi bo‘yicha muzokaralarni boshladi, deya xabar bermoqda La Gazzetta dello Sport. "Byankonerilar" bosh direktori Damyen Kamolli Igor Tudor davrida 3-4-2-1 sxemasida o‘ynay oladigan futbolchi qidirmoqda.

Madridliklar argentinalik futbolchi uchun 25-30 million yevro talab qilishdi - bu italiyaliklar uchun juda katta summa. "Yuventus" narxni pasaytirishga yoki bitimni sotib olish imkoniyati bilan ijara formatida rasmiylashtirishga umid qilmoqda.

Bundan tashqari, turinliklar o‘z o‘yinchilaridan birini - masalan, Dushan Vlaxovich, Nikolas Gonsales yoki Ueston Makkenni kabi futbolchilarni transferga qo‘shish imkoniyatini ko‘rib chiqmoqda. Bunday variant "Atletiko" uchun unchalik qiziq emas, deb hisoblanmoqda.

Molina o‘tgan mavsum La Ligada 30 ta o‘yinda maydonga tushib, 3 ta golli uzatmani amalga oshirdi.