"Kristal Pelas" futbolchisi Eberechi Eze o‘z oilasiga yozda klubini o‘zgartirish niyati haqida ma’lum qildi.

TBR Football nashri xabariga ko‘ra, uning faoliyatidagi keyingi qadam Londonning "Arsenal" klubiga o‘tish bo‘ladi. Qayd etilishicha, "kanonirlar" haqiqatdan ham 27 yoshli futbolchining xizmatlariga qiziqish bildirmoqda va uning transferi bo‘yicha muzokaralar olib bormoqda.

Shu bilan birga, klub hozirda "Sporting"dan hujumchi Viktor Dyokereshni sotib olish bo‘yicha kelishuvni yakunlashga e’tibor qaratmoqda. O‘tgan mavsumda Eze "Pelas" tarkibida 43 ta o‘yinda maydonga tushib, 14 ta gol urdi va 11 ta golli uzatmani amalga oshirdi. Uning klub bilan shartnomasi 2027 yilning yoziga qadar mo‘ljallangan va Transfermarkt ma’lumotlariga ko‘ra, uning bozor narxi 55 million yevroga baholangan.