"Liverpul" Angliya chempionatida transferlarga eng ko‘p pul sarflagan klublar ro‘yxatini boshqarmoqda. Nufuzli "Transfermarkt" portali e’lon qilgan raqamlar shundan dalolat beradi.

"Liverpul" umumiy qiymati 308,68 million yevro bo‘lgan 6 nafar futbolchini o‘z safiga qo‘shib oldi. Ular orasida hujumkor yarim himoyachi Florian Virs (125 million), markaziy hujumchi Ugo Ekitike (95) va chap qanot himoyachisi Milosh Kerkez (46,9) bor.

Ikkinchi pog‘onadan 243,77 million yevro ko‘rsatkich bilan "Chelsi" joy olgan. Jamoaning eng yirik xaridi chap qanot vingeri Jeymi Gittens (64,3 million), shuningdek, 2 nafar markaziy hujumchi - Joao Pedro (63,7) va Liam Delap (35,5) bo‘ldi.

Kuchli uchlikni "Arsenal" (157,8 million yevro) yakunlab bergan. "Kanonirlar" tayanch yarim himoyachisi Martin Zubimendini 70 million, o‘ng qanot vingeri Noni Maduekeni 55,4 million, shuningdek, markaziy himoyachi Kristian Moskerani 15 million evaziga o‘z safiga qo‘shib oldi.

Shuningdek, top-10 likdan "Manchester Yunayted" (153,2 million), "Manchester Siti" (145,7 million), "Tottenxem Xotspur" (140,6 million), "Sanderlend" (115,9 million), "Brayton" (80 million), "Byornli" (79,75 million) va "Lids" (69,4 million) klublari joy olgan.