Londonning "Arsenal" klubi braziliyalik hujumchisi Gabriel Jezus vataniga qaytishi mumkin. RTI Esporte nashrining xabar berishicha, Braziliya A Seriyasi vakili "Flamengo" klubi inglizlar jamoasi futbolchisini o‘z safiga qo‘shib olish borasida faol ish olib bormoqda.

Manbaga ko‘ra, braziliyaliklar "kanonirlar"ga futbolchi transferi bo‘yicha taklif bilan chiqishga tayyorgarlik ko‘rmoqda. 28 yoshli forvardning "Arsenal" bilan shartnomasi 2027 yilning yozigacha mo‘ljallangan. Transfermarkt portali futbolchini 32 mln yevroga baholamoqda.

Eslatib o‘tamiz, Jezus tizzasining xochsimon bog‘lamlari uzilganidan keyin tiklanishda davom etmoqda. Uning maydonga qaytishi noyabr oyida kutilmoqda. O‘tgan mavsumda braziliyalik futbolchi barcha musobaqalarda 27 ta o‘yinda maydonga tushib, 7 ta gol va 2 ta golli uzatmani amalga oshirdi.