Malayziyaning Kuching shahrida para taekvondo bo‘yicha navbatdagi Osiyo chempionati o‘tkazildi.

Unda qit’amizning 22 ta mamlakatidan jami 180 nafarga yaqin para taekvondochilar ishtirok etdi. Musobaqada O‘zbekiston milliy terma jamoasining 17 nafar vakili ham medallar uchun bahs olib bordi.

Paralimpiya o‘yinlari uchun muhim reyting ochkolarini ulashuvchi ushbu Osiyo chempionatida yurtdoshlarimiz 3 ta oltin, 4 ta kumush va 3 ta bronza, jami 10 ta medalni qo‘lga kiritgan holda umumjamoa hisobida birinchi bo‘ldi va yana bir bor qit’amizning eng kuchli jamoalaridan ekanini isbotladi.

Osiyo chempionatining oltin medali Zuhriddin Tohirov (63 kg), Umida Mamarajabova (52 kg) va Roziya Ergashevaga (65 kg) nasib etgan bo‘lsa, Muhammadsodiq Usmonov (58 kg), Asadbek Toshtemirov (+80 kg), Qizlarxon Isomiddinova (47 kg) hamda Karomat Rustamova (52 kg) kumush medalga ega chiqdi.

Shuningdek, Qudrat Haydarov (63 kg), Qudratillo Sunnatov (70 kg) va So‘g‘diyona Normo‘minova (+65 kg) shohsupaning uchinchi pog‘onasidan joy oldi.