"Bavariya" hujumchisi Luis Dias "Lion"ga qarshi shanba kungi o‘rtoqlik o‘yinidan so‘ng tizzasidagi og‘riqdan shikoyat qildi. Kolumbiyalik futbolchi yengil og‘riqdan so‘ng yana o‘zini yaxshi his qila boshladi. Qisqa muddatli tibbiy yordamdan so‘ng Dias bosh barmog‘ini yuqoriga ko‘rsatdi va bemalol yura boshladi. Bu haqda Bayern & Germany Germaniyaning Sky telekanaliga tayanib xabar bermoqda.

Eslatib o‘tamiz, "Bavariya" "Lion"ni 2:1 hisobida mag‘lub etdi. O‘yinda hujumkor yarim himoyachi Maykl Olise dubl muallifi bo‘ldi. Luis Dias bu o‘yinda "Bavariya" safida debyut qildi. Yaqinda kolumbiyalik futbolchi "Liverpul"dan Myunxen klubiga o‘tgandi.

"Bavariya" uchun yangi mavsum 16 avgust kuni Germaniya Superkubogi doirasida "Shtutgart"ga qarshi o‘yin bilan boshlanadi.