Ispaniyalik darvozabon Joan Garsiya yozda "Barselona" safiga kelib qo‘shildi va yangi jamoasi bilan yangi mavsumga tayyorgarlik ko‘rmoqda. Darvozabon "Vissel Kobe"ga qarshi o‘rtoqlik o‘yinida asosiy tarkibdagi debyutini o‘tkazishga ulgurdi.
Biroq, rahbariyat tomonidan mavsumga yangi kelgan futbolchini ro‘yxatdan o‘tkazish masalasi hal etilmagan. Ma’lum bo‘lishicha, "Barselona" yaqin bir haftadayoq Garsiyani ro‘yxatdan o‘tkazishni rejalashtirmoqda va buni boshqa futbolchilarini sotmasdan qanday amalga oshirishni biladi.
Klub yangi darvozabonni ro‘yxatdan o‘tkazish uchun Mark-Andre Ter Shtegenning jarohatidan foydalanmoqchi. Biroq ta’kidlanishicha, "ko‘k-anorranglilar"ning boshqa ssenariylari ham mavjud bo‘lib, zarurat tug‘ilganda ulardan foydalanishlari mumkin.
Eslatib o‘tamiz, "Barselona"ning germaniyalik posboni Mark-Andre Ter Shtegen jarohati sabab, kamida 3 oy maydonga tusha olmasligi mumkin.
