Toshkent shahridagi “JAR” stadionida Yoshlar ishlari agentligi, Davlat xavfsizlik xizmati, Ichki ishlar vazirligi hamda O‘zbekiston mahallalari uyushmasi hamkorligida yurtimiz faxri, mashhur futbolchi Abduqodir Husanovga bo‘lgan chuqur hurmat ifodasi sifatida betakror san’at va sport sintezi bo‘lgan yirik loyiha amalga oshirildi.
Loyiha doirasida “JAR” stadionida 15 ming dona kubik-rubik yordamida tayyorlangan ulkan mozaika portretlar orqali Abduqodir Husanov hamda uning jamoadoshlari tasvirlandi. Ushbu portretlar yosh ijodkor, beqiyos iqtidor egasi Husanboy Mirzahabibov boshchiligidagi ijodiy jamoa tomonidan tayyorlandi.
O‘zbek yoshlarining salohiyati, iqtidorini butun dunyoga ko‘rsatish, shuningdek, Abduqodir Husanov shaxsi orqali yurtimiz yoshlarining Vatanga sadoqati va xalqimizning ehtiromini butun jahon sport jamoatchiligiga yetkazish maqsadida tashkil etilgan mazkur loyiha Yoshlar ishlari agentligi tomonidan qo‘llab-quvvatlanib, hamkor tashkilotlar bilan birgalikda amalga oshirildi.
Yakunda eng qizg‘in jarayonlar aks etgan maxsus videorolik tayyorlandi va “Manchester Siti” futbol klubining rasmiy instagram sahifasi bilan kollaborasiya qilindi.
