Madridning “Real” klubi yozgi transfer oynasi payti “Liverpul” yarim himoyachisi Aleksis Makallister hamda “Chelsi” futbolchisi Enso Fernadeshni xarid qilishni istamoqda. Fichajes nashri xabariga ko‘ra, “qirollik klubi” argentinalik ikki futbolchi uchun 100 million yevro sarflashga tayyor.

Manbaga ko‘ra, madridliklar yangi mavsum oldidan yarim himoya chizig‘ini kuchaytirishni rejalashtirmoqda. Fernandesh va Makallister “Real” murabbiyi Xabi Alonsoning talablariga to‘liq mos keladi: taktik, jismoniy barqarorlik, katta o‘yinlardagi tajriba va kuchli xarakter. Biroq bu transferlarni amalga oshirish oson bo‘lmaydi. Fernandesh “Chelsi”, Makallister esa “Liverpul” safidagi asosiy futbolchilar hisoblanadi. Shu sabab “Real” muzokaralarni ehtiyotkorlik bilan olib bormoqda.

Klub prezidenti Florentino Peres ilgari ko‘plab kutilmagan transferlarni amalga oshirgan. Mazkur holat ushbu kelishuvlarning amalga oshish ehtimolini ko‘paytirmoqda. Ayni paytda muzokaralar bo‘lmoqda. Agar barcha tomonlar kelishuvga erishsa, har ikki futbolchi yangi mavsum “Real Madrid” safida to‘p surishi mumkin.

Enso Fernandesh o‘tgan mavsumda “Chelsi” safida 53 o‘yinda maydonga tushib, 9 ta gol va 17 ta golli uzatmaga mualliflik qilgan. Transfermarkt portali argentinalik futbolchining qiymatini 75 million yevroga baholagan.

Aleksis Makallister esa “Liverpul” tarkibida 49 uchrashuvda maydonga tushib, 7 ta gol va 6 ta assist qayd etgan. Uning bozor qiymati 100 million yevro deb belgilangan.