O‘zbekiston Superligasining 17-turidan o‘rin olgan bahsda "Navbahor" o‘z maydonida Jizzaxning "So‘g‘diyona" jamoasini qabul qiladi.
Mazkur klublar O‘zbekiston chempionatlarining  superliga (oliy liga)sida o‘zaro 59-marta uchrashishgan.
Ushbu o‘yinlarning 28 tasida "Navbahor"  g‘alaba qozongan bo‘lsa, "So‘g‘diyona" 23 ta bahsda zafar quchgan, 8 ta o‘yinda esa durang qayd etilgan. To‘plar nisbatidagi ko‘rsatkich 98-70, "Navbahor" foydasiga.
Namanganliklar o‘zaro o‘yinlarda 92 ochkoni qo‘lga kiritishgan bo‘lsa, jizzaxliklar hisobida 77 ochko mavjud.
"Navbahor" – "So‘g‘diyona" klublari o‘rtasidagi o‘zaro uchrashuvlardagi eng yirik hisob 1996 yili qayd etilgan. O‘sha yili "lochinlar" Namanganda jizzaxliklar darvozasiga 7 ta javobsiz to‘p kiritishgandi.
Sermahsullik borasida esa 2000 va 2014 yillardagi uchrashuvlar tarixda qolgan.
E’tiborlisi, o‘sha o‘yinlarda darvozalarga to‘qqiztadan gol urilgan.
2000 yili Namanganda bo‘lib o‘tgan uchrashuvda mezbonlar 6:3 hisobida zafar quchishgan bo‘lsa, 2014 yili Jizzaxda o‘tkazilgan bahsda "So‘g‘diyona" 5:4 hisobida g‘alaba qozongandi.
Namanganda bo‘lib o‘tgan  29 uchrashuvning 21 tasida "lochinlar" zafar quchishgan bo‘lsa, 3 ta o‘yinda jizzaxliklar g‘alaba qozonishgan, 5 ta bahsda esa jamoalar durangga imzo chekishgan.
"Navbahor"ning o‘z maydonida bo‘lib o‘tgan o‘yinlaridagi to‘plar nisbati – 63-20.
Mazkur jamoalarning 1-davrada Jizzaxda bo‘lib o‘tgan bahsida "Navbahor" 3:2 hisobida zafar quchgandi. Mezbonlarning goliga Lupcho Doriyev (14,76), namanganliklarning gollariga esa Po‘latxo‘ja Xoldorxonov (2), Ruslanbek Jiyanov (66)  va Augusto Pedro (90)lar mualliflik qilishgandi.   
Eslatib o‘tamiz, "Navbahor" – "So‘g‘diyona" o‘yini  bugun Namangandagi "Markaziy" stadionida soat 19:00 da start oladi.