Ўзбекистон Суперлигасининг 17-туридан ўрин олган баҳсда "Навбаҳор" ўз майдонида Жиззахнинг "Сўғдиёна" жамоасини қабул қилади.
Мазкур клублар Ўзбекистон чемпионатларининг  суперлига (олий лига)сида ўзаро 59-марта учрашишган.
Ушбу ўйинларнинг 28 тасида "Навбаҳор"  ғалаба қозонган бўлса, "Сўғдиёна" 23 та баҳсда зафар қучган, 8 та ўйинда эса дуранг қайд этилган. Тўплар нисбатидаги кўрсаткич 98-70, "Навбаҳор" фойдасига.
Наманганликлар ўзаро ўйинларда 92 очкони қўлга киритишган бўлса, жиззахликлар ҳисобида 77 очко мавжуд.
"Навбаҳор" – "Сўғдиёна" клублари ўртасидаги ўзаро учрашувлардаги энг йирик ҳисоб 1996 йили қайд этилган. Ўша йили "лочинлар" Наманганда жиззахликлар дарвозасига 7 та жавобсиз тўп киритишганди.
Сермаҳсуллик борасида эса 2000 ва 2014 йиллардаги учрашувлар тарихда қолган.
Эътиборлиси, ўша ўйинларда дарвозаларга тўққизтадан гол урилган.
2000 йили Наманганда бўлиб ўтган учрашувда мезбонлар 6:3 ҳисобида зафар қучишган бўлса, 2014 йили Жиззахда ўтказилган баҳсда "Сўғдиёна" 5:4 ҳисобида ғалаба қозонганди.
Наманганда бўлиб ўтган  29 учрашувнинг 21 тасида "лочинлар" зафар қучишган бўлса, 3 та ўйинда жиззахликлар ғалаба қозонишган, 5 та баҳсда эса жамоалар дурангга имзо чекишган.
"Навбаҳор"нинг ўз майдонида бўлиб ўтган ўйинларидаги тўплар нисбати – 63-20.
Мазкур жамоаларнинг 1-даврада Жиззахда бўлиб ўтган баҳсида "Навбаҳор" 3:2 ҳисобида зафар қучганди. Мезбонларнинг голига Лупчо Дориев (14,76), наманганликларнинг голларига эса Пўлатхўжа Холдорхонов (2), Русланбек Жиянов (66)  ва Аугусто Педро (90)лар муаллифлик қилишганди.   
Эслатиб ўтамиз, "Навбаҳор" – "Сўғдиёна" ўйини  бугун Намангандаги "Марказий" стадионида соат 19:00 да старт олади.