O‘zbekiston Superligasining 18-turidan o‘rin olgan “Andijon” – “Navbahor” (0:1) uchrashuvidan keyingi matbuot anjumanining birinchi qismida mehmonlar bosh murabbiyi Sergey Lushan ishtirok etib, OAV xodimlarining savollariga javob berdi.
- O‘yin haqidagi fikringiz?
- Qiyin bahsni o‘tkazdik. “Andijon”ga qarshi kechadigan bellashuvlar doimo qiyin kechgan. Bir yarim yildan buyon Namanganda ishlab kelyapman va ushbu vaqt davomida andijonliklarga qarshi nechta uchrashuv o‘tkazgan bo‘lsak, hech qaysinisi oson kechmagan. Derbi o‘z nomi bilan derbi. Futbolchilarga rahmat, bugungi ko‘rsatmalarni 90 foizga to‘g‘ri bajarishdi. Ketma-ket ikkita durangdan so‘ng, g‘alaba qozonganimiz yaxshi bo‘ldi. O‘ylaymanki, mazkur yutuq jamoamizga oldinga qarab ishlash hamda rivojlanish uchun turtki beradi. Raqibning ko‘plab hujumlarini to‘xtatib qoldik. Albatta, o‘zimiz hujumga ko‘p o‘tmadik, lekin ijobiy natija qayd eta oldik. Qo‘lga kiritilgan zafar bilan futbolchilarimiz va muxlislarni tabriklayman.
- O‘tgan turdagi “So‘g‘diyona” bilan bo‘lgan uchrashuvni asosiy tarkibda boshlagan futbolchilardan bir nechtasi bugun asosiy tarkibda o‘ynamadi. Bu nima bilan bog‘liq?
- Avvalgi o‘yindan keyin ham aytgandim, biz yozgi yig‘inni ko‘ngildagidek o‘tkaza olmadik. Qariyb 70 foiz futbolchilar yig‘inda ishtirok eta olishmadi. Legionerlar ikkinchi davra startiga besh kun qolganida, Jiyanov bilan Mirsaidovlar esa 4 kun qolganida safimizga qo‘shilishdi. Bu esa mashg‘ulotlarda o‘z ta’sirini ko‘rsatdi. Hozirgi paytga kelib. hamma mashg‘ulotlarda qatnashyapti va o‘zini ko‘rsatishga harakat qilyapti. Qo‘shimcha mashqlar bajarishyapti. O‘yindan - o‘yinga kuchayib boramiz, deb umid qilaman. Boltaboyev ham endi-endi jamoaga kirishib ketyapti. “So‘g‘diyona”ga qarshi kechadigan O‘zbekiston kubogi o‘yinigacha hamma yaxshi formada bo‘ladi, deb o‘ylayman.
- O‘yindan qoniqdingizmi?
- Ha, jamoamizning harakatidan qoniqdim. Ta’kidlaganimdek, futbolchilar ko‘rsatmalarni to‘g‘ri bajarishdi. Chiroyli gol ham urdik. Biz hozir jamoa tuzish hamda shakllantirish ustida ish olib boryapmiz. Qiyin uchrashuvlar orqali bunga erishamiz.
- Jamoa sardori Azim Ahmedov nima uchun maydonga tushmayapti?
- Bu raqobat bilan bog‘liq. Albatta, Azim Ahmedov kuchli futbolchi, u nafaqat maydonda, balki jamoadoshlari orasida ham yetakchi. Lekin himoya chizig‘imizda braziliyaliklar yaxshiroq ko‘rinmoqda. Ulardan kimdir safdan chiqsa, Azim o‘rnini to‘ldiradi. Bir tomondan zaxira o‘rindig‘imizda shunday o‘yinchi borligi yaxshi, chunki istalgan payt uni maydonga tushirib, foydalana olamiz.
