"PSJ" darvozaboni Janluidji Donnarummaning kelajagi so‘nggi kunlarda futbolda eng ko‘p muhokama qilinayotgan mavzulardan biri. Italiyalik futbolchi joriy transfer oynasida Parij klubini tark etadi - bu ma’lumotni uning o‘zi tasdiqladi. Donnarumma "PSJ" muxlislari bilan xayrlashgan murojaatini ijtimoiy tarmoqlaridagi sahifasiga joyladi va unga "Manchester Siti" forvardi Erling Xoland "layk" bosdi. Jamoatchilik buni darvozabonning tez orada Xosep Gvardiola jamoasiga o‘tishiga ishora sifatida qabul qildi.
Aynan "Manchester Siti" Janluidji Donnarummaga asosiy da’vogar sifatida tilga olinmoqda. Mish-mishlarga ko‘ra, 26 yoshli futbolchi allaqachon "shaharliklar" bilan shartnoma borasida kelishib olgan.













