"Liverpul" hujumchisi Ugo Ekitike Angliya Premyer-ligasidagi debyut o‘yinidan keyin o‘z fikrlarini bildirib o‘tdi.

Fransuz birinchi turda "Bornmut"ga qarshi o‘yinning 37-daqiqasida gol urgan bo‘lsa, ikkinchi bo‘lim boshida Kodi Gakpoga assistentlik qildi va APLdagi debyut o‘yinida gol va assistentlik qilgan "Liverpul" tarixidagi ikkinchi futbolchiga aylandi. Bahs Arne Slot jamoasining 4:2 hisobidagi g‘alabasi bilan yakunlandi.

"Yaxshi o‘yin, lekin bundan ham yaxshiroq o‘ynashim mumkin edi. Eng muhimi - biz xarakter ko‘rsatib, g‘alaba qozondik. Biz bugun bizni qo‘llab-quvvatlash uchun kelgan muxlislarimiz va Diogu uchun g‘alaba qozonishni xohladik. Biz o‘z maqsadimizga erishdik va buni istagan barcha uchun xursandman," - dedi "qizillar"ning yangi futbolchisi Sky Sports’ga bergan intervyusida.