O‘zbekiston milliy terma jamoasi futbolchisi Odil Hamrobekov “CAFA Nations Cup” musobaqasi oldidan o‘z fikrlarini bildirib o‘tdi.

“Erondagi faoliyatim yaxshi boshlandi. Albatta, bu futbolchi uchun quvonarli. U yerdan kelib, milliy terma jamoa mashg‘ulotlariga qo‘shildim. Bugundan musobaqaga tayyorgarlik ko‘rishni boshlaymiz.

“Terma jamoalar markazida”dagi barcha sharoitlar yaxshi, futbolchilar uchun barcha qulayliklar mavjud. Umuman olganda musobaqaga tayyorgarlik ko‘rish uchun barchasi yaratilib berilgan.

Oldimizga qo‘yilgan jahon chempionatiga chiqish vazifasini uddaladik. Endilikda mundialda munosib ishtirok etish uchun yaxshi tayyorgarlik ko‘rishimiz kerak.

Dastlabki o‘yinlarda yetakchi legioner futbolchilarning yo‘qligi qanchalik ta’sir qilishini vaqt ko‘rsatadi. Ularning o‘rnida o‘ynadiganlar uchun bu yaxshi imkoniyat bo‘lishi mumkin.

O‘mon — yaxshi shakllangan jamoa. Aytish mumkinki, natijalari, sovrinlari bilan maqtana olmasa ham raqiblariga jiddiy qarshilik ko‘rsata olishi bilan nom qozongan.

Hozir ular Karlush Keyrush qo‘l ostida yanada jiddiy jamoaga aylanib bormoqda. Menimcha, ertaga yaxshi saviyadagi o‘yin guvohi bo‘lamiz.

Milliy terma jamoa bosh murabbiyligi haqida rasman tasdiqlangandan keyin gapirsak, to‘g‘ri bo‘ladi. Hozirgi kunda Temur Tohirovich (Kapadze) bosh murabbiyimiz hisoblanadi. Aynan uning ko‘rsatmalari bilan turnirga tayyorgarlik ko‘ryapmiz”, — dedi Hamrobekov O‘FA matbuot xizmatiga bergan intervyusida.