Niderlandiyaning "Ayaks" klubi hujumchi Brayan Brobbini Angliyaning "Sanderlend" jamoasiga sotadi. Bu haqda Telegraaf portali xabar bermoqda.

Manbaga ko‘ra, "Ayaks" 20 million yevro oladi, yana 5 millioni bonuslar ko‘rinishida o‘tkazilishi mumkin. "Sanderlend" futbolchiga uni qoniqtiradigan shartnoma taklif qilishi qoldi. Futbolchi shanba kungi "Volendam"ga qarshi o‘yinda ishtirok etmadi, chunki murabbiy u o‘yinga e’tibor qarata olmaydi degan xulosaga keldi.

Brobbi "Ayaks"ni transfer oynasi boshidayoq tark etishi mumkin edi, ammo u dastlab "Komo" variantini rad etdi, keyin "Renn" yoki "Lill"ga o‘tishni istamadi. Shuni ham ta’kidlash kerakki, "Fulxem" Brobbini sotib olish o‘rniga ijaraga olmoqchi bo‘lgani uchun variantni rad etgandi.

23 yoshli Brobbi "Ayaks" tarbiyalanuvchisi hisoblanadi, u 163 ta o‘yinda maydonga tushib, 56 ta gol urgan va 24 ta golga hammualliflik qilgan. Niderlandiya terma jamoasi safida 8 ta o‘yinda maydonga tushib, 1 ta gol urgan.