Portugaliyalik mutaxassis Paulu Bentu O‘zbekiston terma jamoasining taklifini rad etishi mumkin. Bu haqda jurnalist Aleksandr Troiskiy o‘zining Telegram kanalida xabar berdi.

Troiskiyning yozishicha, O‘zbekiston futbol assosiasiyasi (O‘FA) Paulu Bentuga bosh murabbiylik lavozimi bo‘yicha rasmiy taklif yuborgan. Murabbiy muzokaralar olib borish maqsadida Toshkentga kelib, shartnoma shartlari bilan tanishib chiqqan. Biroq taqdim etilgan shartnoma portugaliyalik mutaxassisga ma’qul kelmagan va tez orada O‘zbekistonni tark etgan.

Manbaning qo‘shimcha qilishicha, Bentu ayni paytda boshqa terma jamoalar hamda Yevropaning bir nechta klublaridan ham takliflar olgan. Xususan, unga Italiya klublaridan birining jiddiy qiziqish bildirayotgani aytilmoqda.

Avvalroq Temur Kapadze CAFA Nations Cup-2025 musobaqasining 1-turidan o‘rin olgan Ummonga qarshi bahsdan (1:1) so‘ng o‘tkazilgan matbuot anjumanida Paulu Bentuning O‘zbekiston terma jamoasi bosh murabbiyi bo‘lishi deyarli aniq ekanini aytgandi:

“Menga bu bo‘yicha savol bermasalaring ham bo‘ladi. Oktzbrda Urugvayga qarshi bo‘ladigan o‘yinda milliy jamoani kim boshqarishini hammangiz bilib o‘tiribsizlar. Qolgani nima bo‘ladi buni vaqt ko‘rsatadi”.

Ma’lumot uchun, Temur Kapadze 2025-yil yanvar oyida O‘zbekiston terma jamoasini boshqaryviga kelgan edi. U Srechko Katanes iste’foga chiqqanidan so‘ng vaqtincha bosh murabbiy etib tayinlangan. Kapadze hozirga qadar terma jamoa bosh murabbiyi sifatida 6 ta o‘yinda ishtirok etib, 2 ta g‘alaba va 4 ta durang natija qayd etgan.