Jahon Shaxmat Federasiyasi avgust oyining yakuni bo‘yicha reytingni yangiladi. Yangilangan ro‘yxatning kuchli 100 taligiga 5 nafar o‘zbekistonlik grossmeyster kirdi.

Norvegiyalik Magnus Karlsen hali ham FIDE reytingida yetakchilik qilmoqda. Hozirda uning hisobida 2839 ochko mavjud. Ikkinchi pog‘onani amerikalik Hikaru Nakamura (2807) egallagan bo‘lsa, kuchli uchlikka yana bir AQSH vakili Fabiano Karuana (2789) kiradi.

O‘zbekistonlik grossmeyster Nodirbek Abdusattorov to‘rt pog‘ona pastladi. U so‘nggi bir necha oy davomida 7-o‘rinni egallab kelayotgan edi, ammo avgust yakunlariga ko‘ra u reytingda 11-pog‘onani band etgan. Hozirda Abdusattorov hisobida 2748 ochko bor (o‘tgan oyda 2771 ochko bo‘lgan).

Xalqaro musobaqalarda O‘zbekiston sharafini himoya qilayotgan yana bir shaxmatchi Javohir Sindorov esa bir pog‘ona ko‘tarildi. U iyul oyida FIDE reytingida 25-o‘rinni band qilgan bo‘lsa, avgust yangilanishida 24-o‘ringa ko‘tarildi (2722 ochko bilan).

Rustam Qosimjonov so‘nggi oylar davomida O‘zbekistonning eng kuchli uchinchi shaxmatchisi nomini hech kimga bermay kelayotgan edi. Biroq avgust oyida Nodirbek Yakubboyev (2681 ochko) keskin ko‘tarildi va reytingda 59-o‘rindan 45-o‘ringa chiqdi. U nafaqat 14 pog‘ona ko‘tarildi, balki Rustam Qosimjonovni ortda qoldirib, mamlakatning 3-raqamli shaxmatchisiga ham aylanib oldi. Qosimjonov esa 2675 ochko bilan 46-o‘rindan joy olgan. O‘zbekistonlik yana bir grossmeyster Shamsiddin Vohidov esa avgust oyi reytingida pastladi. U hozirda 2645 ochko bilan 83-o‘rinni egallab turibdi (avval 76-o‘rin).

O‘zbekiston shaxmat federasiyasi esa jamoalar reytingida 13-o‘rinni egallab turibdi. Federasiya hisobida 2601 ochko mavjud.