Ispaniyaning "Xetafe" klubi Angliyaning "Xall Siti" klubi bilan Abu Kamarani ijaraga olish bo‘yicha kelishuvga erishdi. Jamoa rasmiy sayti xabariga ko‘ra, Angliya U20 terma jamoasida (2 ta o‘yin) o‘ynagan futbolchi mavsumning qolgan qismini Ispaniyada o‘tkazadi.
"Norvich" tarbiyalanuvchisi bo‘lgan va Afrikaning Serra-Leone davlatida tug‘ilgan 22 yoshli o‘ng qanot himoyachisi "Portsmut"da ham o‘ynagan. Ushbu klub tarkibida Kamara Angliyaning uchinchi divizioni g‘olibi bo‘ldi.
O‘tgan mavsumda u klub miqyosida 40 ta o‘yinda maydonga tushib, 6 ta gol urdi va 4 ta golli uzatmani amalga oshirdi. Transfermarkt portali Kamaraning narxini 4 million yevroga baholamoqda.
