Zagrebning "Dinamo" klubi "Milan"dan Ismael Bennaserni qanday shartlar asosida ijaraga olgani ma’lum bo‘ldi.
27 yoshli futbolchining Xorvatiya klubiga ijara asosida o‘tgani kuni kecha e’lon qilindi. Jurnalist Fabrisio Romanoning yozishicha, zagrebliklar xavbekni 10 mln yevroga sotib olishi mumkin. Bundan tashqari, manbaning ta’kidlashicha, "Dinamo" ijara davrida jazoirlik futbolchiga maoshining 40 foizini to‘laydi, qolgan 60 foizini esa "Milan" to‘lashda davom etadi.
Ismael Bennaser 2019 yildan beri "Milan" sharafini himoya qilib kelayotgandi, futbolchi o‘tgan mavsumning ikkinchi yarmini Fransiyaning "Marsel" klubida o‘tkazgandi. Yarim himoyachining "rossonerilar" bilan shartnomasi 2027 yilning yozigacha mo‘ljallangan.
