"Marsel"ning sobiq yarim himoyachisi Adrian Rabyo fransuz jamoasi muxlislariga murojaat qilib, ularni qo‘llab-quvvatlagani va ruhlantirgani uchun minnatdorlik bildirdi.

30 yoshli futbolchi "Marsel" kiyinish xonasida jamoadoshi Jonatan Rou bilan mushtlashgani uchun klubdan ketdi. "Oq-ko‘klar" rahbariyati ikkala futbolchini ham asosiy jamoadan chetlatdi, keyin esa transferga qo‘ydi. 1 sentyabr kuni Rabyo "Milan" bilan 2028 yil yozigacha shartnoma imzoladi.

"Aziz "Marsel" muxlislari, "Milan"dagi yangi sarguzashtimni boshlashdan avval sizlarga murojaat qilmoqchiman. Jamoaga kelgan birinchi kunimdanoq "PSJ"dagi o‘tmishimga e’tibor bermagansiz va meni darhol marsellik sifatida qabul qilgansiz. Men ketgunimcha shunday bo‘ldi. Butun mavsum davomida meni qo‘llab-quvvatladingiz, hamroh bo‘ldingiz, ilhomlantirdingiz, olqishladingiz... doimiy tayanch bo‘ldingiz. Sizni harakatga keltiradigan bu haroratni, bu ehtirosni, futbolga bo‘lgan muhabbatni his qildim. Men "Velodrom"dagi muhitni, bayram onlaridagi quvonchni va eng asosiysi - bu stadionda gol urganingdagi ta’riflab bo‘lmas hissiyotni hech qachon unutmayman," - deb yozdi yarim himoyachi o‘zining ijtimoiy tarmoqlardagi sahifasida.