"Vilyarreal" vingeri Nikolya Pepe avgust oyi yakunlariga ko‘ra La Liganing eng yaxshi futbolchisi deb topildi. 30 yoshli futbolchi avgust oyidagi uchta o‘yinda ikkita gol va bitta golli uzatmani amalga oshirdi, "sariq suv osti kemasi" esa to‘qqiz imkoniyatdan yettita ochko to‘pladi.
Nikolya Pepe "Vilyarreal"ga o‘tgan yilning yozida Turkiyaning "Trabzonspor" klubidan ko‘chib o‘tgan edi. Ivuarlik futbolchi bungacha "Arsenal", "Nissa", "Lill" va "Anje" klublarida to‘p tepgan.
Bugun Marselino Garsiya Toral jamoasi Ispaniya chempionati 4-turi doirasida "Atletiko" Madrid mehmoni bo‘ladi. Uchrashuv Toshkent vaqti bilan 00:00 da start oladi.
