Chorshanba kuni "PSJ" Chempionlar Ligasida o‘z chempionligini himoya qilishni boshlaydi. Umumiy bosqichning 1-turida Luis Enrike jamoasi o‘z maydonida "Atalanta"ga qarshi bahs olib boradi. Raqib haqida parijliklar bosh murabbiyi Luis Enrike o‘z fikrlarini bildirdi.
"Yozda "Atalanta" murabbiyini o‘zgartirdi, shuning uchun ular qanday o‘ynashini oldindan aytish qiyin, ammo bu yuqori pressing va to‘p bilan o‘ynashni biladigan sifatli futbolchilarga ega kuchli jamoa. Italiya jamoalariga qarshi o‘ynash har doim ham oson bo‘lmagan", - deya Enrikening matbuot anjumanidagi so‘zlarini keltiradi UEFA.
Eslatib o‘tamiz, "Atalanta"ni yozda Ivan Yurich qabul qilgan edi. Bu Jan Pyero Gasperini "Roma"ga o‘tishga qaror qilganidan ko‘p o‘tmay sodir bo‘ldi.













