Чоршанба куни "ПСЖ" Чемпионлар Лигасида ўз чемпионлигини ҳимоя қилишни бошлайди. Умумий босқичнинг 1-турида Луис Энрике жамоаси ўз майдонида "Аталанта"га қарши баҳс олиб боради. Рақиб ҳақида парижликлар бош мураббийи Луис Энрике ўз фикрларини билдирди.
"Ёзда "Аталанта" мураббийини ўзгартирди, шунинг учун улар қандай ўйнашини олдиндан айтиш қийин, аммо бу юқори прессинг ва тўп билан ўйнашни биладиган сифатли футболчиларга эга кучли жамоа. Италия жамоаларига қарши ўйнаш ҳар доим ҳам осон бўлмаган", - дея Энрикенинг матбуот анжуманидаги сўзларини келтиради УЕФА.
Эслатиб ўтамиз, "Аталанта"ни ёзда Иван Юрич қабул қилган эди. Бу Жан Пьеро Гасперини "Рома"га ўтишга қарор қилганидан кўп ўтмай содир бўлди.
