Janubiy Amerika futbol assosiasiyalari ittifoqi (KONMEBOL) 2030 yilda bo‘ladigan jahon chempionati ishtirokchilari sonini 64 taga yetkazish taklifini ilgari surdi. Bu haqda Diario Olé nashri xabar tarqatdi.

Manbaga ko‘ra, FIFA mazkur taklif qo‘llab-quvvatlamqda. Bu holda turnir 4 tadan jamoadan iborat 16 ta guruh formatida o‘tadi va har bir guruhdan ikkita eng yaxshi jamoa pley-off bosqichiga yo‘l oladi.

Mundial-2030ning asosiy mezboni Ispaniya, Portugaliya va Marokash hisoblanadi. Dastlabki rejaga ko‘ra, Jahon chempionatlarining 100 yilliga munosabati bilan Janubiy Amerikaning 3 ta davlati — Argentina, Paragvay va Urugvayda ham bittadan o‘yinni o‘tkazish rejalashtirilgandi. Yangi taklifga ko‘ra, ushbu mamlakatlar o‘rin olgan guruhning barcha o‘yinlarini o‘sha davlatlarda o‘tkazish ko‘zda tutilmoqda. Qolgan guruhlarga Ispaniya, Portugaliya va Marokash mezbonlik qiladi.

Bundan oldin FIFA jahon chempionatida ishtirokchilar sonini 32 tadan 48 taga ko‘paytirgan edi va, ko‘rinib turibdiki, bu bilan to‘xtab qolmaydi», — deyiladi Diario Olé xabarida.

Ma’lumot o‘rnida. 2026 yilgi jahon chempionatida 48 ta jamoa ishtirok etadi. Shu kengaytirish tufayli ko‘plab mamlakatlar tarixda ilk bor mundialga yo‘l oldi (jumladan, O‘zbekiston va Iordaniya).