Noyabr oyida O‘zbekiston va Qozog‘iston terma jamoalari o‘rtasida o‘yin o‘tkazilmaydi.
Iyul oyida Qozog‘iston futbol federasiyasi prezidenti Marat Omarov terma jamoalar o‘rtasidagi ehtimoliy o‘yin haqida gapirgan edi.
Uchrashuv bekor qilinganini Qozog‘iston terma jamoasi boshqa raqib bilan o‘rtoqlik uchrashuvi o‘tkazishga kelishib olgani ham tasdiqlaydi. Qozog‘iston terma jamoasida noyabr oyida faqat bitta o‘rtoqlik uchrashuvi o‘tkazish imkoniyati bor edi, chunki 15 noyabr kuni Belgiyaga qarshi Jahon chempionati saralashining so‘nggi o‘yini bo‘lib o‘tadi.
Qozog‘istonlik jurnalistlar aynan O‘zbekiston terma jamoasi Qozog‘iston terma jamoasi bilan o‘rtoqlik o‘yinidan voz kechgani, shu sababli Qozog‘iston noyabr oyi uchun boshqa raqib topganini ma’lum qilishdi.
Rad etishning sababi sifatida Marat Omarov o‘yinni muzokaralar bosqichidayoq va rasmiy kelishuvdan oldin ommaga e’lon qilgani aytilmoqda, bu esa o‘zbek futbol rasmiylarining noroziligiga sabab bo‘lgan.
