Londonning “Arsenal” klubi Madridning “Real” jamoasida to‘p surayotgan turkiyalik yarim himoyachi Arda Gyulerni o‘z tarkibiga qo‘shib olishni rejalashtirgan edi. Biroq futbolchining yangi mavsumdagi yuqori darajadagi o‘yini sababli londonliklar bu xaridni amalda imkonsiz deb hisoblab, uning transferidan voz kechishga majbur bo‘ldi. Bu haqda Fichajes nashri xabar berdi.

Manbaga ko‘ra, “Arsenal” bosh murabbiyi Mikel Arteta Arda Gyulerni Martin Edegor uchun munosib o‘rinbosar sifatida ko‘rayotgan edi. Hatto klub yozgi transfer oynasi chog‘ida futbolchi uchun taklif ham yuborgan. Biroq “Real” ustozi Xabi Alonso Gyuler jamoa uchun muhim futbolchi ekanini ta’kidlab, bu transferga qat’iy rad javobini bergan.

Ayni paytda ham “Real Madrid” klubining Gyuler borasidagi pozisiyasi o‘zgarmagan. Rahbariyat futbolchi uchun bo‘lgan takliflarni ko‘rib chiqish niyatida emas. Mazkur vaziyat “Arsenal” tomonining fikrini o‘zgartirdi va natijada Gyulerni ehtimoliy transferlar ro‘yxatidan chiqarib tashladi.

Ma’lumot o‘rnida, Arda Gyuler joriy mavsum “Real” safida jami 7 ta o‘yinda maydonga tushib, o‘z hisobiga 2 ta gol va 2 ta golli uzatma yozdirib qo‘ydi. Futbolchining klub bilan shartnomasi 2029 yil yozigacha amal qiladi. Transfermarkt portali uning qiymatini 45 million yevroga baholanmoqda.