Angliyaning “Manchester Siti” klubi ispaniyalik yarim himoyachi Rodri uchun munosib o‘rinbosar qidirmoqda. Futbolchi 2024-yilda “Oltin to‘p”ni qo‘lga kiritgan bo‘lishiga qaramay, tizzasidan olgan og‘ir jarohat sababli 53 ta o‘yinni o‘tkazib yuborgan edi. Uning yo‘qligida “Siti”ning o‘yin sifati jiddiy tushib ketdi. 29 yoshli futbolchi jamoaning so‘nggi beshta uchrashuvida asosiy tarkibda maydonga tushdi, ammo Pep Gvardiola uning o‘rniga boshqa futbolchi qidirayotgani aytilmoqda.

CityXtra nashri tarqatgan xabarga ko‘ra, “shaharliklar” “Bavariya” futbolchisi Aleksandr Pavlovichni sotib olmoqchi. 21 yoshli futbolchi nafaqat yuqori saviyali, balki liderlik fazilatlariga ham ega. Bu esa uni “Manchester Siti”ning tayanch yarim himoya chizig‘iga mos tushadigan o‘yinchiga aylantiradi.

Pavlovichning “Bavariya” bilan shartnomasi 2029-yilning yoziga qadar amal qiladi. Shunga qaramay, “Manchester Siti”ning moliyaviy imkoniyatlari ushbu transferni amalga oshirishga yetarli ekani ta’kidlanmoqda.

Ma’lumot uchun, Pavlovich “Bavariya” akademiyasi tarbiyalanuvchisi hisoblanadi. U joriy mavsum myunxenliklar safida 6 ta uchrashuvda maydonga tushib, o‘z hisobiga 1 gol yozdirib qo‘ygan. Transfermarkt portali Aleksandrning qiymatini 55 million yevroga baholamoqda.